عمرك سمعت عن التخت

الاتراك كانو بيحترمو الموسيقى جدا و عشان كدا نظمو ليها مكان مخصص يكون موجود فى كل جلساتهم يسليهم

 و اتسمى باسم (التخت) وكلمة تخت معناها مكان عالى ، فالعازفين كانو يجلسو فى المكان ده عشان يسمح لجميع الحضور انهم يشوفوهم

التخت فى البداية كان محدود جدا و كان بيتكون من المغنى و ابرع عازفين فقط (الة القانون ، الة الناى ، الة الكمان ، اله العود)

والكورس اللى كانو بيتسمو صهبجية و دول اللى كانو بيشاركو المغنى الغناء فى اللزمات فقط و دول كانو اتنين او تلاته من اصوات بيتوفر فيها مساحات صوتية عالية ، وبجانب المغنى كان بيكون موجود عازف الايقاع عشان يرشد الفرقة كلها للزمن والوقفات و ده كان من ضمن علم (زرياب) اللى اتكلمنا عنه قبل كدا

كان التخت بيتقسم على تلات وصلات يعنى تلات اجزاء 

اول وصلة كانت عبارة عن موسيقى فقط بيتعزف فى مقام موسيقى معين و الوصلة التانية بيختلف فيها المقام الموسيقى وتبدأ بعدها الوصلة الثالثة بقالب سماعى او بشرف اما الوصلة الأخيرة بتجمع كل العازفين مع 

المغنى و كانت بتتسمى (القفلة)، و القالب الموسيقى اصله تركى 

والقالب الموسيقى ليه اكتر من نوع من اسهلهم فى العزف و الاخف منهم للاستماع 

قالب السماعى Listen  و قالب البشرف Listen

و كان المغنى بيبدأ الغناء دائما فى بداية الوصلة التانية وبيبدأ بعده الصهبجية يردوعليه فى الموال عشان ينهى المغنى الاساسى الموال وهكذا حتى نهاية قالب الموسيقى،فكان اغلب العبئ على المغنى فقط فى هذه الفتره

 من اشهر مغنيين التخوت فى هذا العصر و يعتبرالوحيد فى زمنه كان (المقدم) وكان التخت وقتها بسيط واتشهر فى بدايته فى قهوة بين الشجر بعدا امر الخديوى اسماعيل بتحويل المكان ده لمكان مخصص للغناء وسماها حديقة الازبكية 

التخت بعدها بقا فى مقام مدرسة موسيقية بيتعلم فيها المنشدين اصول الفن و مكنش حد بغنى غير لو عدا من اختبار التخت ده قدام لجنة بتتكون من كبار الفنانين والموسيقيين، و كان فيه رئيس لموسيقيين و المغنيين اسمه (شيخ الطائفة) ده شيه نقيب الموسيقيين دلوقتى، وكان ليه سلطه عليهم و كان بيخصص دخل شهرى لكل شخص فيهم و بيمنح رخصة لكل اللى عايزيحترف الغنا او العزف ، و من الشخصيات اللى اتسجل اساميهم فى سجل الفنانين من خلال شيخ الطائفة عبده الحامولى ومحمدعثمان و محمد سالم ومحمد عبد الرحيم المسلوب 

و من المنشدين الشيخ البيطار و الشيخ خليل رضوان 

استخدم الحامولى فى اغانيه مقامات مكانتش موجودة فى مصر وقتها زى مقام العجم و الكرد و الحجاز و تعاون مع كبار الشعراء زى محمود سامى البارودى وعائشة التيمورية

و كمان استعان ببعض الشعراء و المثقفين عشان يترجمو مجموعة اغانى تركية الى اللغة العربية، ويعتبر 

الحامولى اول مغنى بدأ فى تلحين القصائد زى قصيدة (اراك عصى الدمع) اللى غنتها كوكب الشرق (أم كلثوم)

Listen